కొత్త కార్మిక చట్టాలపై దేశవ్యాప్తంగా ఉద్యోగుల్లో ఆందోళనలు వ్యక్తమవుతున్నాయి. ముఖ్యంగా ఈ మార్పుల వల్ల చేతికి వచ్చే జీతం (PF)) తగ్గుతుందనే భయం చాలా మందిలో కనిపిస్తోంది. అయితే ఆర్థిక నిపుణుల అభిప్రాయం ప్రకారం, సరైన విధంగా శాలరీ స్ట్రక్చర్ను ప్లాన్ చేస్తే ఉద్యోగులు నష్టపోకుండా, కంపెనీల ఖర్చు కూడా పెరగకుండా బ్యాలెన్స్ సాధించవచ్చని చెబుతున్నారు.
కొత్త నిబంధనల ప్రకారం ఉద్యోగి జీతంలో అలవెన్సుల భాగం మొత్తం జీతంలో 50 శాతం దాటకూడదు. అంటే HRA, బోనస్ వంటి భాగాలు కలిపి ఈ పరిమితిలోనే ఉండాలి. ఒకవేళ ఈ పరిమితి దాటితే, మిగిలిన మొత్తాన్ని కూడా బేసిక్ పేలో భాగంగా పరిగణించి ప్రావిడెంట్ ఫండ్ (PF) కోతలు పెరుగుతాయి. దీని వల్ల ఉద్యోగికి నెలవారీగా చేతికి వచ్చే జీతం తగ్గే అవకాశం ఉంది.
అయితే ఇక్కడ ఒక ముఖ్యమైన విషయం ఏమిటంటే, పీఎఫ్ కంట్రిబ్యూషన్ను కనీస స్థాయిలో పరిమితం చేసే అవకాశం ఇప్పటికీ ఉంది. యజమాని, ఉద్యోగి ఇద్దరూ అంగీకరిస్తే, పీఎఫ్ను రూ.15,000 బేసిక్పై 12% (అంటే నెలకు రూ.1,800) వద్దే ఉంచుకోవచ్చు. ఈ విధానం వల్ల టేక్-హోమ్ సాలరీ తగ్గకుండా ఉంటుంది. అయితే దీని వల్ల రిటైర్మెంట్ సమయంలో వచ్చే పొదుపు తక్కువగా ఉండొచ్చని కూడా గుర్తుంచుకోవాలి.
ఇంకా ఒక ముఖ్యమైన అంశం ట్యాక్స్ సేవింగ్ అలవెన్సులు. కంపెనీలు ఉద్యోగులపై పన్ను భారాన్ని తగ్గించేందుకు శాలరీ స్ట్రక్చర్లో పలు ప్రయోజనాలను చేర్చుతున్నాయి. ఉదాహరణకు HRAతో పాటు ఫుడ్ కూపన్లు, ఫ్యూయల్ రీయింబర్స్మెంట్, కారు లీజు, మొబైల్ లేదా గ్యాడ్జెట్ లీజు వంటి ప్రయోజనాలు ఇవ్వడం ద్వారా పన్ను తగ్గించవచ్చు. ఇవి ఉద్యోగి నికర ఆదాయాన్ని పెంచడంలో సహాయపడతాయి.
అదే విధంగా నేషనల్ పెన్షన్ సిస్టమ్ (NPS)లో యజమాని కాంట్రిబ్యూషన్ చేర్చడం ద్వారా అదనపు పన్ను ప్రయోజనాలు పొందవచ్చు. ఇది భవిష్యత్తులో రిటైర్మెంట్ ప్లానింగ్కు కూడా మేలు చేస్తుంది. జీతం నిర్మాణాన్ని తెలివిగా మార్చుకోవడం ద్వారా ఉద్యోగులు ఒకేసారి పన్ను ఆదా, పొదుపు, మరియు చేతికి వచ్చే జీతం మధ్య సరైన సమతౌల్యం సాధించవచ్చు.
కొత్త కార్మిక చట్టాలు వచ్చినప్పటికీ, బేసిక్ పే కచ్చితంగా 50 శాతం ఉండాలని ఎక్కడా చెప్పలేదు. కాబట్టి, ఉద్యోగులు తమ కంపెనీ హెచ్ఆర్ విభాగంతో చర్చించి, పన్నుకు అనుకూలంగా శాలరీ స్ట్రక్చర్ను మార్చుకోవడం మంచిది. సరైన ప్రణాళికతో ముందుకెళితే, ఈ మార్పులు ఉద్యోగులకు నష్టంగా కాకుండా లాభదాయకంగా మారే అవకాశముంది.
Also read:
