(Goa) లో టాక్సీ ఛార్జీల వ్యవస్థపై మరోసారి తీవ్ర చర్చ మొదలైంది. కేవలం 4 కిలోమీటర్ల ప్రయాణానికి రూ.800 వసూలు చేశారంటూ ఓ టూరిస్ట్ సోషల్ మీడియా వేదిక Reddit లో చేసిన పోస్ట్ ఇప్పుడు వైరల్గా మారింది. గోవాలో పర్యాటకులు ఎదుర్కొంటున్న రవాణా సమస్యలను ఈ పోస్ట్ మరోసారి వెలుగులోకి తీసుకొచ్చింది.
వైరల్ అయిన పోస్టులో టూరిస్ట్ గోవాలో టాక్సీ సేవలు చాలా ఖరీదుగా ఉన్నాయని పేర్కొన్నాడు. ముఖ్యంగా తక్కువ దూరానికి కూడా భారీగా డబ్బులు వసూలు చేస్తున్నారని ఆవేదన వ్యక్తం చేశాడు. స్థానిక టాక్సీ వ్యవస్థ కారణంగా పర్యాటకులు తీవ్ర ఇబ్బందులు ఎదుర్కొంటున్నారని వివరించాడు.
అలాగే Goamiles యాప్ సేవలపై కూడా ఫిర్యాదులు వ్యక్తమయ్యాయి. యాప్ ద్వారా ముందుగానే డబ్బు చెల్లించినప్పటికీ డ్రైవర్లు ట్రిప్కు రావడం లేదని టూరిస్ట్ పేర్కొన్నాడు. బుకింగ్ కన్ఫర్మ్ అయిన తర్వాత కూడా గంటల పాటు వేచి చూడాల్సి వస్తోందని ఆరోపించాడు. పైగా క్యాన్సిల్ అయిన ట్రిప్లకు రిఫండ్ రావడానికి సుమారు 8 రోజుల సమయం పడుతోందని అసహనం వ్యక్తం చేశాడు.
(Goa) గోవాలో Uber,Ola, Rapido వంటి ప్రముఖ క్యాబ్ సేవలు పూర్తిస్థాయిలో పనిచేయకపోవడానికి స్థానిక టాక్సీ డ్రైవర్ల నిరసనలే కారణమని పోస్టులో పేర్కొన్నారు. స్థానిక డ్రైవర్లు బయటి యాప్ ఆధారిత టాక్సీ సేవలను అడ్డుకుంటున్నారని, దీంతో ప్రయాణికులకు ప్రత్యామ్నాయాలు లేకుండా పోతున్నాయని ఆరోపణలు వినిపిస్తున్నాయి.
సోషల్ మీడియాలో ఈ అంశంపై పెద్ద ఎత్తున చర్చ జరుగుతోంది. కొందరు పర్యాటకులు గోవాలో అధిక టాక్సీ ఛార్జీల కారణంగా ప్రయాణ ఖర్చులు భారీగా పెరుగుతున్నాయని అంటున్నారు. మరికొందరు డ్రైవర్ల ప్రవర్తన కూడా భయపెట్టేలా ఉంటోందని కామెంట్లు చేస్తున్నారు. “ఇలా కొనసాగితే గోవా టూరిజంపై తీవ్ర ప్రభావం పడుతుంది” అంటూ పలువురు నెటిజన్లు అభిప్రాయపడుతున్నారు.
టూరిజం రంగం గోవా ఆర్థిక వ్యవస్థకు ప్రధాన ఆధారం. ప్రతి సంవత్సరం లక్షలాది మంది దేశీయ, విదేశీ పర్యాటకులు గోవాను సందర్శిస్తుంటారు. అయితే రవాణా సమస్యలు, అధిక ఛార్జీలు, యాప్ సేవలపై పరిమితులు వంటి అంశాలు పర్యాటక అనుభవాన్ని దెబ్బతీస్తున్నాయని పలువురు చెబుతున్నారు.
ప్రస్తుతం వైరల్ అవుతున్న ఈ పోస్టుపై గోవా టూరిజం వర్గాలు, స్థానిక టాక్సీ సంఘాలు ఎలా స్పందిస్తాయన్నది ఆసక్తికరంగా మారింది. పర్యాటకులకు సరసమైన, పారదర్శకమైన రవాణా సేవలు అందించాల్సిన అవసరం ఉందని సోషల్ మీడియాలో డిమాండ్లు పెరుగుతున్నాయి.
Also read: