దక్షిణ భారత సినీ సంగీత ప్రపంచాన్ని తన మధుర స్వరంతో అలరించిన లెజెండరీ గాయని (S. Janaki) ఇకలేరు. 1938 ఏప్రిల్ 23న గుంటూరు జిల్లా రేపల్లె తాలూకా పల్లపట్ల గ్రామంలో శ్రీరామమూర్తి, సత్యవతి దంపతులకు జన్మించిన ఆమె అసలు పేరు శిష్ట్లా శ్రీరామమూర్తి జానకి. ఆమె తండ్రి ఉపాధ్యాయుడు, ఆయుర్వేద వైద్యుడు కావడంతో ఉద్యోగ రీత్యా కరీంనగర్ జిల్లా సిరిసిల్లలో నివసించారు.
అందువల్ల జానకమ్మ చిన్ననాటి జీవితం ఎక్కువ భాగం సిరిసిల్లలోనే గడిచింది. చిన్న వయస్సు నుంచే సంగీతంపై ఆసక్తి పెంచుకున్న ఆమె అనేక సంగీత విద్వాంసుల వద్ద శిక్షణ పొందారు. 1957లో విడుదలైన తమిళ చిత్రం ‘విధియిన్ విలాయట్టు’ ద్వారా సినీ గాయనిగా అరంగేట్రం చేశారు. అనంతరం తెలుగు, తమిళం, మలయాళం, కన్నడ తదితర భాషల్లో దాదాపు 50 వేలకు పైగా పాటలు పాడి అరుదైన రికార్డు నెలకొల్పారు. (S Janaki) గాన ప్రతిభకు గుర్తింపుగా నాలుగు జాతీయ అవార్డులు, వివిధ రాష్ట్ర ప్రభుత్వాల నుంచి 31 పురస్కారాలు, 12 నంది అవార్డులు అందుకున్నారు.
సంగీత దర్శకుడు Ilaiyaraaja స్వరపరిచిన అనేక గీతాలు, S. P. Balasubrahmanyamతో కలిసి పాడిన యుగళగీతాలు ప్రత్యేక ప్రాచుర్యం పొందాయి. మైసూరు విశ్వవిద్యాలయం ఆమెకు గౌరవ డాక్టరేట్ ప్రదానం చేయగా, తమిళనాడు ప్రభుత్వం కలైమామణి పురస్కారంతో సత్కరించింది. 2013లో కేంద్ర ప్రభుత్వం ప్రకటించిన పద్మభూషణ్ పురస్కారాన్ని దక్షిణ భారత కళాకారులకు సరైన గుర్తింపు లభించడం లేదనే కారణంతో తిరస్కరించడం కూడా ఆమె వ్యక్తిత్వానికి నిదర్శనం. పాటల్లో మిమిక్రీ మేళవించి విభిన్న స్వరాలతో పాడగల అరుదైన ప్రతిభ ఆమె సొంతం. భక్తిగీతాలు, సంగీత దర్శకత్వం, రచన వంటి రంగాల్లోనూ ఆమె సేవలు అందించారు. భర్త వి. రామ్ప్రసాద్ మరణానంతరం చెన్నైలో నివసిస్తూ సంగీతాభిమానులతో అనుబంధాన్ని కొనసాగించారు. చివరి వరకు సంగీతానికే అంకితమైన జానకమ్మ గాన వారసత్వం ఎప్పటికీ చిరస్థాయిగా నిలిచిపోతుంది.
