తెలంగాణలో ఆహార కల్తీ నిరోధక చర్యల్లో భాగంగా ఫుడ్ సేఫ్టీ అధికారులు, పోలీస్ టాస్క్ఫోర్స్ కలిసి (Karimnagar) కరీంనగర్ జిల్లాలో నిర్వహించిన దాడుల్లో సంచలన విషయాలు బయటపడ్డాయి. మానవ వినియోగానికి ఉద్దేశించిన సోయా చంక్స్ తయారీలో పశువుల దాణాగా ఉపయోగించే రఫ్ బ్రాన్ (తవుడు, గోధుమ పొట్టు) కలుపుతున్నట్లు అధికారులు గుర్తించారు.(Karimnagar) రామడుగు మండలం దేశరాజుపల్లి గ్రామంలోని ‘మెగా ఇండస్ట్రీస్’ అనే యూనిట్పై ఆకస్మిక తనిఖీలు నిర్వహించగా, ప్యాకెట్లపై FSSAI గుర్తింపు, పోషక విలువల వివరాలు ముద్రించి, లోపల మాత్రం నాణ్యతలేని పదార్థాలు కలుపుతున్నట్లు తేలింది.
తనిఖీల సందర్భంగా విక్రయానికి సిద్ధంగా ఉన్న 755 కిలోల సోయా చంక్స్ను, తయారీ కోసం నిల్వ ఉంచిన 1600 కిలోల రఫ్ బ్రాన్ను అధికారులు సీజ్ చేశారు. ఈ ముడి పదార్థాలు వరంగల్ ప్రాంతంలోని ఒక మిల్లింగ్ యూనిట్ నుంచి సరఫరా అయినట్లు ప్రాథమిక విచారణలో వెల్లడైంది. సీజ్ చేసిన ఉత్పత్తుల నుంచి నమూనాలను సేకరించి ప్రభుత్వ ప్రయోగశాలకు పంపించారు. ల్యాబ్ నివేదిక ఆధారంగా సంబంధిత వ్యక్తులపై క్రిమినల్ కేసులు నమోదు చేసి, చట్టపరమైన చర్యలు తీసుకుంటామని అధికారులు తెలిపారు. ఇటీవల మార్కెట్లో కల్తీ ఆహార పదార్థాల సంఖ్య పెరుగుతుండటంతో వినియోగదారుల్లో ఆందోళన వ్యక్తమవుతోంది.
వైద్యుల ప్రకారం, నాణ్యతలేని లేదా కల్తీ చేసిన మిల్ మేకర్ను తరచుగా తీసుకుంటే జీర్ణ సమస్యలు, గ్యాస్ట్రిక్ ఇబ్బందులు, కాలేయంపై ప్రతికూల ప్రభావాలు కలగవచ్చని హెచ్చరిస్తున్నారు. ఫుడ్ సేఫ్టీ విభాగం ప్రజల ఆరోగ్యంతో చెలగాటమాడే సంస్థలపై కఠిన చర్యలు కొనసాగిస్తామని స్పష్టం చేసింది. వినియోగదారులు కూడా ప్యాకెట్లపై తయారీదారు వివరాలు, FSSAI నంబర్, గడువు తేదీ వంటి అంశాలను తప్పనిసరిగా పరిశీలించి కొనుగోలు చేయాలని అధికారులు సూచిస్తున్నారు. అనుమానాస్పద ఉత్పత్తులు కనిపిస్తే ఫుడ్ సేఫ్టీ అధికారులకు సమాచారం అందించాలని కోరుతున్నారు.
Also read:
