దేవీ శరన్నవరాత్రుల సందర్భంగా భక్తులు తొమ్మిది రోజుల పాటు భక్తిశ్రద్ధలతో ఉపవాస దీక్షలు పాటిస్తారు. ఈ సమయంలో సాధారణ ఆహారానికి బదులుగా తమ ఆచారాలకు అనుగుణంగా సాత్విక ఆహారం తీసుకుంటారు. ఉపవాస సమయంలో ఆకలి, నీరసం కలగకుండా పోషకాలు అందించే ఆహారాన్ని ఎంచుకోవడం ముఖ్యం. అలాంటి సమయంలో మఖానా (Laddu) లడ్డూలు మంచి చిరుతిండిగా ఉపయోగపడతాయి. తక్కువ సమయంలో ఇంట్లోనే వీటిని సులభంగా తయారు చేసుకోవచ్చు.
మఖానా అంటే తామర గింజల నుంచి లభించే ఫాక్స్ నట్స్. వీటిలో ప్రోటీన్, ఫైబర్, ఖనిజాలు ఉంటాయి. వీటికి జీడిపప్పు, బాదం, నెయ్యి జోడించడం వల్ల లడ్డూలకు రుచి, పోషక విలువలు పెరుగుతాయి. అయితే వీటిలో చక్కెర, నెయ్యి కూడా ఉంటాయి కాబట్టి పరిమితంగా తీసుకోవడం మంచిది.
కావాల్సిన పదార్థాలు
మఖానా రెండు కప్పులు, నెయ్యి రెండు నుంచి మూడు టేబుల్ స్పూన్లు, జీడిపప్పు 50 గ్రాములు, బాదం పప్పు 50 గ్రాములు, ఎండు కొబ్బరి తురుము అర కప్పు, పంచదార పావు కప్పు, యాలకులు మూడు లేదా నాలుగు తీసుకోవాలి. అవసరాన్ని బట్టి పదార్థాల పరిమాణాన్ని మార్చుకోవచ్చు.
తయారీ విధానం
ముందుగా బాండీలో ఒక టేబుల్ స్పూన్ నెయ్యి వేసి వేడి చేయాలి. అందులో మఖానా వేసి తక్కువ మంటపై కరకరలాడే వరకు వేయించాలి. అనంతరం వాటిని ప్లేటులోకి తీసి చల్లారనివ్వాలి.
అదే బాండీలో కొద్దిగా నెయ్యి వేసి జీడిపప్పు, బాదం పప్పులను దోరగా వేయించాలి. తర్వాత ఎండు కొబ్బరి తురుము వేసి కొద్దిసేపు వేయించి పక్కన పెట్టుకోవాలి.
మిక్సీ జార్‌లో పంచదార, యాలకులు వేసి మెత్తని పొడిలా చేసుకోవాలి. ఆ తర్వాత చల్లారిన మఖానా, వేయించిన డ్రై ఫ్రూట్స్‌ను వేసి మరీ మెత్తగా కాకుండా పొడి చేసుకోవాలి.
ఈ మిశ్రమాన్ని ఒక గిన్నెలోకి తీసుకుని పంచదార పొడితో బాగా కలపాలి. మిశ్రమం పొడిగా ఉంటే కొద్దికొద్దిగా కరిగించిన నెయ్యి కలుపుతూ చేత్తో లడ్డూలుగా చుట్టుకోవాలి.
నిల్వ చేసుకునే విధానం
(Laddu) లడ్డూలను పూర్తిగా చల్లారిన తర్వాత శుభ్రమైన, పొడి గాలి చొరబడని డబ్బాలో భద్రపరచాలి. ఎక్కువ రోజులు నిల్వ చేయాలంటే తేమ లేకుండా చూసుకోవాలి. పాలు, కోవా లేదా కండెన్స్‌డ్ మిల్క్ కలిపితే త్వరగా పాడయ్యే అవకాశం ఉంటుంది కాబట్టి ఫ్రిజ్‌లో ఉంచి త్వరగా వినియోగించాలి.
నవరాత్రి ఉపవాస సమయంలో రుచికరమైన చిరుతిండిగా ఈ మఖానా లడ్డూలను ఆస్వాదించవచ్చు. అయితే ఉపవాస నియమాలు ప్రాంతాన్ని బట్టి మారుతాయి. కాబట్టి మీ ఆచారాలకు అనుగుణంగా పదార్థాలను ఎంచుకోవాలి.
Also read:
