టాలీవుడ్ స్టార్ హీరోయిన్ సమంత (Samantha) ప్రధాన పాత్రలో నటించి, స్వయంగా నిర్మించిన తాజా యాక్షన్ ఫ్యామిలీ ఎంటర్టైనర్ ‘మా ఇంటి బంగారం’ విడుదలకు సిద్ధమైంది. దర్శకురాలు నందినీ రెడ్డి తెరకెక్కించిన ఈ చిత్రం జూన్ 19న ప్రేక్షకుల ముందుకు రానుంది. విడుదలకు ముందు చిత్రబృందం ప్రమోషన్స్ను వేగవంతం చేయగా, సమంత చేసిన కొన్ని ఆసక్తికర వ్యాఖ్యలు ప్రస్తుతం సోషల్ మీడియాలో వైరల్గా మారాయి.
‘మా ఇంటి బంగారం’ సినిమా గురించి మాట్లాడిన (Samantha) సమంత, మహిళా ప్రాధాన్యత చిత్రాలపై ఉన్న సంప్రదాయ అభిప్రాయాలను మార్చాలనే ఉద్దేశంతో ఈ సినిమాను రూపొందించినట్లు తెలిపారు. సాధారణంగా ఉమెన్ సెంట్రిక్ సినిమాలు అంటే సామాజిక సందేశం ఉండాలి, కథానాయిక త్యాగమూర్తిగా కనిపించాలి, అన్ని మంచి లక్షణాలతో ఆదర్శవంతమైన పాత్రగా చూపించాలనే అభిప్రాయం ప్రేక్షకుల్లో ఏర్పడిందని ఆమె అన్నారు. అయితే ఆ పరిమితులను దాటుకుని పూర్తి స్థాయి మాస్ కమర్షియల్ ఎంటర్టైనర్ను కూడా మహిళా ప్రధాన పాత్రతో రూపొందించవచ్చని నిరూపించాలనేదే తమ లక్ష్యమని పేర్కొన్నారు.
ఈ సందర్భంగా పాన్ ఇండియా స్టార్ ప్రభాస్ స్టార్డమ్ గురించి కూడా సమంత ఆసక్తికర వ్యాఖ్యలు చేశారు. పెద్ద హీరోల సినిమాలకు ప్రేక్షకుల నుంచి భారీ స్పందన రావడం వెనుక ఎన్నో సంవత్సరాల కృషి ఉంటుందని ఆమె అభిప్రాయపడ్డారు. ప్రభాస్ ప్రస్తుతం ఉన్న స్థాయికి ఒక్కరోజులో చేరలేదని, దర్శకులు మరియు రచయితలు ఎన్నో సంవత్సరాల పాటు హీరోను ఎలివేట్ చేసే కథలు రూపొందించడం వల్లే ఆ స్థాయి క్రేజ్ వచ్చిందని చెప్పారు.
ప్రభాస్ స్క్రీన్పై కనిపించినా, ఒక చిన్న హావభావం చేసినా అభిమానులు ఆనందపడే స్థాయికి చేరుకున్నారని సమంత పేర్కొన్నారు. అదే తరహాలో మహిళా ప్రధాన పాత్రల సినిమాలు కూడా భవిష్యత్తులో ఆ స్థాయికి చేరుకోవాలని తాను కోరుకుంటున్నానని తెలిపారు. ప్రస్తుతం ఒక మహిళా ప్రధాన పాత్రతో అలాంటి మాస్ ఎలిమెంట్స్ చేస్తే ప్రేక్షకులు అంగీకరించకపోవచ్చని, కానీ క్రమంగా పరిస్థితులు మారతాయని ఆమె అభిప్రాయపడ్డారు.
దర్శకురాలు నందినీ రెడ్డి కూడా ఇదే విషయాన్ని ప్రస్తావిస్తూ, గతంలో విజయశాంతి మహిళా ప్రధాన పాత్రలతో భారీ కమర్షియల్ విజయాలు సాధించారని గుర్తుచేశారు. అంతేకాకుండా హాలీవుడ్లో వచ్చిన ‘చార్లీస్ ఏంజెల్స్’ వంటి చిత్రాలను ప్రేక్షకులు ఎంతగానో ఆదరించారని తెలిపారు.
సమంత, నందినీ రెడ్డి కలయికలో రూపొందిన ‘మా ఇంటి బంగారం’ సినిమా మహిళా ప్రధాన కథాంశాలతో కూడిన కమర్షియల్ సినిమాలకు కొత్త దిశను చూపుతుందా అనే ఆసక్తి సినీ అభిమానుల్లో నెలకొంది.
