కేంద్ర ప్రభుత్వ ఉద్యోగులు, పెన్షనర్లకు సంబంధించిన (8th Pay) 8వ వేతన సంఘం (8th Pay Commission) చర్చలు వేగం పుంజుకుంటున్నాయి. ఈ నేపథ్యంలో ఉద్యోగ సంఘాలు చేసిన తాజా డిమాండ్లు దేశవ్యాప్తంగా ఆసక్తిని రేకెత్తిస్తున్నాయి. ముఖ్యంగా కనీస వేతనాన్ని భారీగా పెంచడం, ఇంటి అద్దె భత్యం (HRA)లో గణనీయమైన పెంపు, పెన్షనర్లకు అదనపు ప్రయోజనాలు కల్పించడం వంటి అంశాలు ఇప్పుడు ప్రధాన చర్చగా మారాయి.
కేంద్ర ప్రభుత్వ ఉద్యోగులకు ప్రాతినిధ్యం వహిస్తున్న నేషనల్ కౌన్సిల్–జాయింట్ కన్సల్టేటివ్ మెషినరీ (NC-JCM) ఉద్యోగుల విభాగం 8వ కేంద్ర వేతన సంఘానికి అధికారిక వినతిపత్రాన్ని సమర్పించింది. ఈ మెమోరాండంలో ఉద్యోగుల వేతనాలు, భత్యాలు, పెన్షన్ ప్రయోజనాలు, పదోన్నతులు, కెరీర్ పురోగతి వంటి అనేక కీలక అంశాలను ప్రస్తావించారు.
ఉద్యోగ సంఘాల ప్రధాన డిమాండ్లలో ఇంటి అద్దె భత్యం పెంపు కీలకంగా నిలిచింది. ప్రస్తుతం మెట్రో నగరాల్లో పెరుగుతున్న అద్దెలు, జీవన వ్యయం దృష్ట్యా ప్రస్తుత హెచ్ఆర్ఏ రేట్లు సరిపోవడం లేదని వారు పేర్కొన్నారు. అందువల్ల మెట్రో నగరాల్లో హెచ్ఆర్ఏను 40 శాతం వరకు పెంచాలని కోరుతున్నారు. ప్రస్తుతం 7వ వేతన సంఘం ప్రకారం X, Y, Z కేటగిరీ నగరాల్లో వరుసగా 27 శాతం, 18 శాతం, 9 శాతం హెచ్ఆర్ఏ అందుతోంది. కొత్త ప్రతిపాదన అమలైతే ఈ రేట్లు 40 శాతం, 24 శాతం, 12 శాతానికి పెరిగే అవకాశం ఉందని భావిస్తున్నారు.
అదే సమయంలో కనీస వేతన పెంపు కూడా ఉద్యోగుల్లో భారీ ఆశలు రేకెత్తిస్తోంది. ఉద్యోగ సంఘాలు ప్రతిపాదించిన 3.833 ఫిట్మెంట్ ఫ్యాక్టర్ అమలైతే ప్రస్తుతం రూ.18,000గా ఉన్న కనీస మూల వేతనం దాదాపు రూ.69,000కు పెరిగే అవకాశం ఉందని అంచనాలు వ్యక్తమవుతున్నాయి. పెరుగుతున్న ద్రవ్యోల్బణం, విద్య, వైద్యం, గృహ ఖర్చులు వంటి అంశాలను దృష్టిలో ఉంచుకుని ఈ పెంపు అవసరమని ఉద్యోగ సంఘాలు వాదిస్తున్నాయి.
పెన్షనర్ల కోసం కూడా పలు కీలక డిమాండ్లు ప్రతిపాదించారు. పాత పెన్షనర్లు, కొత్తగా పదవీ విరమణ పొందుతున్న పెన్షనర్ల మధ్య పూర్తి పెన్షన్ సమానత్వం తీసుకురావాలని కోరారు. కుటుంబ పెన్షన్ విధానాల్లో మార్పులు, డియర్నెస్ రిలీఫ్ (DR) లెక్కింపు విధానంలో మెరుగుదలలు, కమ్యుటేషన్ కోతలపై సమీక్ష వంటి అంశాలను కూడా వినతిపత్రంలో చేర్చారు.
అదనంగా ఉద్యోగుల పదోన్నతులు, కెరీర్ పురోగతికి సంబంధించిన అంశాలపై కూడా సంస్కరణలు కోరారు. వేతన నిర్మాణంలో ఉన్న అసమానతలను తొలగించడం, ఉద్యోగులకు మెరుగైన ప్రమోషన్ అవకాశాలు కల్పించడం వంటి అంశాలను ఉద్యోగ సంఘాలు ప్రస్తావించాయి.
అయితే ప్రస్తుతం ఇవన్నీ ఉద్యోగ సంఘాలు చేసిన ప్రతిపాదనలు మాత్రమే. తుది నిర్ణయం 8వ కేంద్ర వేతన సంఘం సిఫార్సులు, వాటిపై కేంద్ర ప్రభుత్వం తీసుకునే నిర్ణయాలపై ఆధారపడి ఉంటుంది. దీంతో కేంద్ర ప్రభుత్వ ఉద్యోగులు, పెన్షనర్లు రాబోయే నెలల్లో వెలువడే అధికారిక ప్రకటనల కోసం ఆసక్తిగా ఎదురుచూస్తున్నారు.
Also read:
