ప్రపంచవ్యాప్తంగా కోట్లాది మంది ఐఫోన్ వినియోగదారులు ఎదురుచూస్తున్న (iOS 27) ను యాపిల్ తన వార్షిక డెవలపర్స్ కాన్ఫరెన్స్ WWDC 2026లో ఆవిష్కరించింది. గత ఏడాది పరిచయం చేసిన Liquid Glass డిజైన్కు మరిన్ని మెరుగులు జోడిస్తూ, పనితీరు, కృత్రిమ మేధస్సు (AI) సామర్థ్యాలపై ప్రత్యేక దృష్టి సారించినట్లు సంస్థ వెల్లడించింది.
ఈ కొత్త అప్డేట్లో అత్యంత ఆకర్షణీయమైన ఫీచర్ Siri AI. ఇప్పటివరకు సిస్టమ్లో భాగంగా ఉన్న సిరిని ప్రత్యేక యాప్ రూపంలో అందుబాటులోకి తీసుకురానున్నట్లు యాపిల్ ప్రకటించింది. వినియోగదారులతో జరిగిన గత సంభాషణలను గుర్తుంచుకుని, వాటి ఆధారంగా మరింత వ్యక్తిగతీకరించిన సహాయం అందించే సామర్థ్యాన్ని కూడా ఇందులో చేర్చినట్లు తెలిపింది.
(iOS 27) లో పనితీరు మెరుగుదలలకు కూడా ప్రాధాన్యం ఇచ్చారు. iOS 26తో పోలిస్తే యాప్ల పనితీరు సుమారు 30 శాతం వరకు వేగవంతమైందని యాపిల్ పేర్కొంది. అలాగే ఫొటోలు లోడ్ అయ్యే వేగం 70 శాతం వరకు పెరిగినట్లు వెల్లడించింది. దీంతో యూజర్లకు మరింత స్మూత్ మరియు వేగవంతమైన అనుభవం లభించే అవకాశం ఉంది.
కొత్త డిజైన్ అంశాల్లో Liquid Glass ఇంటర్ఫేస్కు అదనపు యానిమేషన్లు, మెరుగైన విజువల్ ఎఫెక్ట్స్, మరింత సహజమైన యూజర్ అనుభవాన్ని అందించే మార్పులు చేసినట్లు సమాచారం. AI ఆధారిత ఫీచర్లు రోజువారీ వినియోగాన్ని మరింత సులభతరం చేయడమే లక్ష్యంగా రూపొందించబడ్డాయి.
భద్రత, గోప్యత విషయంలో కూడా యాపిల్ కొత్త అప్డేట్లో పలు మెరుగుదలలు తీసుకొచ్చినట్లు టెక్ వర్గాలు చెబుతున్నాయి. యూజర్ల డేటా భద్రతను మరింత బలోపేతం చేసే విధంగా కొత్త ప్రైవసీ ఫీచర్లను చేర్చినట్లు తెలుస్తోంది.
సపోర్ట్ చేసే ఐఫోన్ మోడళ్లకు iOS 27 అప్డేట్ను దశలవారీగా విడుదల చేయనున్నట్లు యాపిల్ ప్రకటించింది. కొత్త ఫీచర్లు, AI సామర్థ్యాలు, మెరుగైన పనితీరుతో iOS 27 యాపిల్ వినియోగదారులకు కొత్త అనుభూతిని అందించే అవకాశం ఉందని విశ్లేషకులు భావిస్తున్నారు.
Also read:
