ప్రపంచ ఐటీ రంగంలో మరోసారి భారీ ఉద్యోగ కోతలు చర్చనీయాంశంగా మారాయి. ప్రముఖ టెక్నాలజీ సంస్థ (Oracle) భారీ స్థాయిలో ఉద్యోగుల తొలగింపును చేపట్టింది. ఆర్టిఫిషియల్ ఇంటెలిజెన్స్ (ఏఐ), క్లౌడ్ కంప్యూటింగ్ రంగాల్లో తన ఆధిపత్యాన్ని మరింత బలోపేతం చేసుకునేందుకు సంస్థ వ్యూహాత్మక మార్పులు అమలు చేస్తోంది. ఈ క్రమంలో ప్రపంచవ్యాప్తంగా వేలాది మంది ఉద్యోగులపై ప్రభావం పడింది.
సంస్థ తాజాగా విడుదల చేసిన వార్షిక నివేదిక ప్రకారం ప్రపంచవ్యాప్తంగా సుమారు 21,000 మంది ఉద్యోగులను తొలగించినట్లు వెల్లడైంది. దీంతో కంపెనీ మొత్తం ఉద్యోగుల సంఖ్యలో దాదాపు 13 శాతం తగ్గుదల నమోదైంది. గత ఏడాది 1.62 లక్షలుగా ఉన్న ఉద్యోగుల సంఖ్య, ఈ ఏడాది మే 31 నాటికి 1.41 లక్షలకు పడిపోయింది. ఈ గణాంకాలు సంస్థ చేపట్టిన పునర్వ్యవస్థీకరణ ఎంత పెద్ద స్థాయిలో ఉందో స్పష్టం చేస్తున్నాయి.
(Oracle) ఒరాకిల్ యాజమాన్యం తెలిపిన వివరాల ప్రకారం, వ్యాపార కార్యకలాపాల్లో ఏఐ టెక్నాలజీ వినియోగం పెరగడం, ఉత్పత్తుల పునర్వ్యవస్థీకరణ, నిర్వహణలో మార్పులు, వ్యూహాత్మక నిర్ణయాలు, అలాగే వివిధ కంపెనీల కొనుగోళ్లు ఈ ఉద్యోగాల కోతలకు ప్రధాన కారణాలుగా నిలిచాయి. సంస్థ భవిష్యత్తు అవసరాలకు అనుగుణంగా కార్యకలాపాలను మలచుకునే ప్రయత్నంలో భాగంగానే ఈ చర్యలు తీసుకున్నట్లు పేర్కొంది.
)
ప్రస్తుతం ఒరాకిల్ క్లౌడ్ కంప్యూటింగ్ మరియు ఏఐ రంగాల్లో మరింత దూకుడుగా ముందుకు సాగుతోంది. ఒకప్పుడు ప్రధానంగా డేటాబేస్ సాఫ్ట్వేర్ సంస్థగా గుర్తింపు పొందిన ఒరాకిల్, ఇప్పుడు ప్రపంచ స్థాయి క్లౌడ్ మరియు ఏఐ మౌలిక వసతుల నిర్మాణంపై దృష్టి సారిస్తోంది. ఈ రంగాల్లో ఇప్పటికే ఆధిపత్యం చెలాయిస్తున్న మైక్రోసాఫ్ట్, అమెజాన్ వంటి దిగ్గజ సంస్థలకు పోటీగా నిలవాలన్నదే కంపెనీ లక్ష్యంగా కనిపిస్తోంది.
అత్యాధునిక ఏఐ డేటా సెంటర్ల నిర్మాణం కోసం సంస్థ భారీ పెట్టుబడులు పెట్టుతోంది. ముఖ్యంగా ఓపెన్ఏఐ వంటి అంతర్జాతీయ క్లయింట్ల అవసరాలను తీర్చేందుకు ప్రపంచ స్థాయి మౌలిక వసతులను అభివృద్ధి చేస్తోంది. ప్రస్తుత ఆర్థిక సంవత్సరంలో సుమారు 70 బిలియన్ డాలర్ల పెట్టుబడులను ఒరాకిల్ అంచనా వేస్తోంది. ఈ నిధులను సమకూర్చుకోవడానికి అప్పులు చేయడంతో పాటు బాండ్ల ద్వారా సుమారు 40 బిలియన్ డాలర్లను సేకరించే ప్రణాళికను సిద్ధం చేసింది.
అయితే ఉద్యోగుల తొలగింపుల ప్రభావం సంస్థ ఆర్థిక వ్యవహారాలపై కూడా పడింది. ఉద్యోగులకు చెల్లించిన సెవరెన్స్ ప్యాకేజీలు, ఇతర పరిహారాల కారణంగా ప్రస్తుత ఆర్థిక సంవత్సరంలో రికార్డు స్థాయిలో 1.84 బిలియన్ డాలర్ల వ్యయం నమోదైంది. గత ఆర్థిక సంవత్సరంలో ఇదే ఖర్చు 374 మిలియన్ డాలర్లుగా ఉండటం గమనార్హం.
ఏఐ విస్తరణతో భవిష్యత్తులో మరిన్ని ఉద్యోగ కోతలు ఉండే అవకాశాన్ని కూడా ఒరాకిల్ పరోక్షంగా సూచించింది. దీంతో ప్రపంచవ్యాప్తంగా ఐటీ ఉద్యోగుల్లో ఆందోళన నెలకొంది. ఆర్టిఫిషియల్ ఇంటెలిజెన్స్ యుగంలో సంస్థలు వేగంగా మారుతున్న వ్యాపార అవసరాలకు అనుగుణంగా ఉద్యోగ నిర్మాణాలను మార్చుకుంటుండటం టెక్ పరిశ్రమలో కొత్త సవాళ్లకు దారి తీస్తోంది.
Also read:
