కార్పొరేట్ రంగంలో కష్టపడి పనిచేస్తే మంచి గుర్తింపు, పదోన్నతులు, ఆకర్షణీయమైన వేతన పెంపులు లభిస్తాయనే నమ్మకంతో ఉద్యోగ జీవితాన్ని ప్రారంభించే వారు ఎంతో మంది ఉంటారు. అయితే కొన్నిసార్లు వాస్తవ పరిస్థితులు వారి అంచనాలకు పూర్తిగా భిన్నంగా ఉంటాయి. తాజాగా (Deloitte)డెలాయిట్లో దాదాపు పదేళ్ల పాటు పనిచేసిన హైదరాబాద్కు చెందిన ఓ సీనియర్ కన్సల్టెంట్ అనుభవం మరోసారి కార్పొరేట్ వర్క్ కల్చర్పై చర్చకు దారితీసింది.
అర్జున్ సింగ్ (పేరు మార్చబడింది) అనే ఈ ఉద్యోగి కాలేజీ పూర్తి చేసిన వెంటనే (Deloitte) డెలాయిట్లో చేరి తన కెరీర్ను అదే సంస్థలో కొనసాగించాలని లక్ష్యంగా పెట్టుకున్నాడు. సంస్థ అభివృద్ధితో పాటు తాను కూడా ఎదుగుతాననే ఆశతో ఎన్నో సంవత్సరాలు అంకితభావంతో పనిచేశానని ఆయన వెల్లడించారు. అయితే కాలక్రమేణా పని ఒత్తిడి పెరగడం, వ్యక్తిగత జీవితానికి సమయం లేకపోవడం, ఆశించిన గుర్తింపు రాకపోవడం తీవ్ర నిరాశకు గురిచేసిందని పేర్కొన్నారు.
తాను చాలా సందర్భాల్లో వారానికి 74 గంటల వరకు పనిచేశానని, ఇది సాధారణ పని గంటలను మించిపోయిందని తెలిపారు. ఇన్ఫోసిస్ సహ వ్యవస్థాపకుడు నారాయణ మూర్తి సూచించిన 70 గంటల పని విధానం కంటే కూడా ఎక్కువ సమయం సంస్థ కోసం వెచ్చించినప్పటికీ, తనకు తగిన పదోన్నతి లభించలేదని ఆవేదన వ్యక్తం చేశారు.
ఏడాదికి సుమారు రూ.35 లక్షల వేతనం పొందుతున్నప్పటికీ, తనకు లభించిన వార్షిక వేతన పెంపు కేవలం ఐదు శాతం మాత్రమేనని ఆయన తెలిపారు. దీర్ఘకాలంగా సంస్థకు విధేయంగా పనిచేసినా, తన కృషికి తగిన గుర్తింపు, ప్రతిఫలం దక్కలేదనే భావనతో చివరకు రాజీనామా చేయాల్సి వచ్చిందన్నారు.
ఈ ఘటనతో కార్పొరేట్ సంస్థల్లో ఉద్యోగులపై పెరుగుతున్న పని ఒత్తిడి, పని-వ్యక్తిగత జీవితం మధ్య సమతుల్యత, ఉద్యోగుల సంక్షేమం, వేతన విధానాలు వంటి అంశాలు మరోసారి చర్చనీయాంశంగా మారాయి. నిపుణులు కూడా ఉద్యోగుల మానసిక ఆరోగ్యం, పనితీరు, సరైన గుర్తింపుకు సంస్థలు అధిక ప్రాధాన్యం ఇవ్వాల్సిన అవసరం ఉందని సూచిస్తున్నారు.
Also read:
