మన దేశంలో గ్రామాలు, పట్టణాలు, నగరాల్లో తరచూ (Hair Business)“వెంట్రుకలకు గిన్నెలు, గ్లాసులు, బఠాణీలు” అంటూ తిరిగే వ్యాపారులను మనం చూస్తుంటాం. చాలా మంది మహిళలు తల దువ్వినప్పుడు రాలిన వెంట్రుకలను దాచిపెట్టి, వాటికి బదులుగా ఇంటి సామాన్లు లేదా చిన్నపాటి వస్తువులు తీసుకుంటారు. మరికొందరు వాటి విలువ తెలియక చెత్తలో పడేస్తుంటారు. అయితే సాధారణంగా కనిపించే ఈ వెంట్రుకల వెనుక వేల కోట్ల రూపాయల అంతర్జాతీయ వ్యాపారం నడుస్తోంది.
భారతదేశంలో సేకరించే మానవ (Hair Business) వెంట్రుకలకు విదేశీ మార్కెట్లో మంచి డిమాండ్ ఉంది. ప్రతి సంవత్సరం కోట్ల రూపాయల విలువైన జుట్టు అమెరికా, యూరప్, చైనా, మలేషియా, థాయ్లాండ్, బంగ్లాదేశ్, శ్రీలంక, మయన్మార్ వంటి అనేక దేశాలకు ఎగుమతి అవుతోంది. ఈ రంగంలో అనేక మంది వ్యాపారులు కోట్లాది రూపాయలు ఆర్జిస్తూ విజయవంతమైన వ్యాపారవేత్తలుగా ఎదిగారు.
వెంట్రుకల ధర వాటి నాణ్యత, పొడవు, దృఢత్వం ఆధారంగా నిర్ణయించబడుతుంది. సాధారణ నాణ్యత కలిగిన జుట్టుకు కూడా కిలోకు రూ.10 వేల నుంచి రూ.12 వేల వరకు ధర లభిస్తుంది. మంచి నాణ్యతతో, రసాయనాలు ఉపయోగించని పొడవాటి వెంట్రుకలకు రూ.25 వేల నుంచి రూ.30 వేల వరకు లభిస్తే, అత్యుత్తమ నాణ్యత కలిగిన జుట్టుకు కిలోకు రూ.50 వేలకుపైగా ధర పలుకుతోంది. ముఖ్యంగా గుజరాత్ మహిళల సహజమైన పొడవాటి జుట్టుకు మార్కెట్లో ప్రత్యేక గిరాకీ ఉంది.
సేకరించిన వెంట్రుకలను నేరుగా ఎగుమతి చేయరు. ముందుగా ప్రత్యేక ఫ్యాక్టరీల్లో శుభ్రపరిచి, క్రిమిరహితం చేసి, గ్రేడింగ్ చేసి, అవసరమైన రసాయన ప్రక్రియల అనంతరం ఎగుమతికి సిద్ధం చేస్తారు. ఈ వెంట్రుకలను ప్రధానంగా విగ్గుల తయారీ, హెయిర్ ఎక్స్టెన్షన్స్, బ్యూటీ ఇండస్ట్రీ, హెయిర్ ట్రాన్స్ప్లాంటేషన్ రంగాల్లో విస్తృతంగా ఉపయోగిస్తున్నారు. కనీసం ఎనిమిది అంగుళాల పొడవు ఉన్న జుట్టుకే అంతర్జాతీయ మార్కెట్లో ఎక్కువ డిమాండ్ ఉంటుంది.
భారతదేశంలోని ప్రముఖ ఆలయాల్లో భక్తులు సమర్పించే తలనీలాలు కూడా ఈ పరిశ్రమకు ప్రధాన వనరుగా నిలుస్తున్నాయి. ముఖ్యంగా తిరుమలలో సేకరించే తలనీలాలను ఈ-వేలం ద్వారా విక్రయిస్తూ భారీ ఆదాయం సమకూరుతోంది. గతంలో తలనీలాల వేలం ద్వారా వందల కోట్ల రూపాయల ఆదాయం లభించడం ఈ వ్యాపార విస్తృతిని స్పష్టంగా తెలియజేస్తుంది.
ఈ రంగంలో చిన్న స్థాయి వ్యాపారం చేయాలనుకునే వారికి కూడా మంచి అవకాశాలు ఉన్నాయి. గ్రామాల్లో, పట్టణాల్లో జుట్టు సేకరించి, శుభ్రపరచి, గ్రేడింగ్ చేసి పెద్ద ఎగుమతి సంస్థలకు విక్రయించడం ద్వారా స్థిరమైన ఆదాయం పొందవచ్చు. సాధారణంగా విలువలేనిదిగా భావించే మానవ వెంట్రుకలు నేడు ప్రపంచ మార్కెట్లో కోట్లాది రూపాయల విలువైన ఉత్పత్తిగా మారడం విశేషం.
Also read:
