ఉద్యోగ అవకాశాల కోసం దక్షిణ (Korea) కొరియాకు వెళ్లాలని ఆలోచిస్తున్న వారికి ఓ ఎన్నారై చేసిన వ్యాఖ్యలు ప్రస్తుతం సోషల్ మీడియాలో చర్చనీయాంశంగా మారాయి. కొరియాలో ఉద్యోగ జీవితం గురించి స్వర్ణిమ్ సింగ్ అనే ఎన్నారై పంచుకున్న వీడియో ఇన్స్టాగ్రామ్లో వైరల్ అవుతోంది. విదేశాల్లో ఉద్యోగం అంటే చాలా మంది ఊహించే అందమైన జీవితం, వాస్తవ పరిస్థితులు మాత్రం పూర్తిగా భిన్నంగా ఉండవచ్చని ఆమె పేర్కొన్నారు.
(Korea) కొరియన్ డ్రామాలు, సినిమాలు చూసి అక్కడి జీవనశైలి గురించి ఒక అభిప్రాయం ఏర్పడుతుందని, కానీ ఉద్యోగ రంగంలో ఎదురయ్యే ఒత్తిళ్లు, కార్యాలయ సంస్కృతి గురించి చాలా మందికి పూర్తిగా తెలియదని ఆమె అన్నారు. ముఖ్యంగా ఉద్యోగ సంతృప్తి విషయంలో అనేక మంది విదేశీయులు నిరాశ చెందుతున్నారని పేర్కొన్నారు.
స్వర్ణిమ్ సింగ్ వెల్లడించిన వివరాల ప్రకారం, దక్షిణ కొరియాలో చాలా కంపెనీల్లో ఉద్యోగుల నుంచి అధిక స్థాయి కమిట్మెంట్ను ఆశిస్తారు. అధికారిక పని గంటలు ముగిసిన వెంటనే కార్యాలయం నుంచి వెళ్లిపోతే ఉద్యోగంపై ఆసక్తి లేదనే భావన కొందరు మేనేజ్మెంట్లలో కనిపిస్తుందని ఆమె తెలిపారు. దీని వల్ల ఉద్యోగులు అదనపు సమయం కార్యాలయంలో గడపాల్సిన పరిస్థితులు ఏర్పడుతున్నాయని చెప్పారు.
అంతేకాకుండా, టీమ్ డిన్నర్లు, కార్యాలయానికి సంబంధించిన సామాజిక కార్యక్రమాల్లో పాల్గొనడం కూడా అక్కడి కార్పొరేట్ సంస్కృతిలో భాగంగా ఉంటుందని వివరించారు. అలాంటి కార్యక్రమాలకు హాజరు కాకపోతే సహచరులు లేదా అధికారులు దాన్ని ప్రతికూలంగా తీసుకునే అవకాశం ఉందని ఆమె అభిప్రాయపడ్డారు. కొందరు ఉద్యోగులు దీనిని వ్యక్తిగత స్వేచ్ఛపై ప్రభావం చూపే అంశంగా భావిస్తున్నారని తెలిపారు.
విదేశాల్లో ఉద్యోగం చేయాలనుకునే వారు కేవలం జీతభత్యాలు లేదా సోషల్ మీడియాలో కనిపించే జీవనశైలిని మాత్రమే కాకుండా, అక్కడి పని సంస్కృతి, ఉద్యోగ పరిస్థితులు, వ్యక్తిగత జీవన సమతుల్యత వంటి అంశాలను కూడా పరిశీలించాలని స్వర్ణిమ్ సూచించారు. ఉద్యోగ అవకాశాల కోసం ఏ దేశానికైనా వెళ్లే ముందు సమగ్ర సమాచారం సేకరించడం అవసరమని ఆమె పేర్కొన్నారు.
ఈ వీడియో ప్రస్తుతం సోషల్ మీడియాలో విశేష స్పందన పొందుతోంది. ఇప్పటికే దీనికి 52 వేలకుపైగా వ్యూస్, 2,500కు పైగా లైక్స్ రావడం గమనార్హం. కొందరు ఆమె వ్యాఖ్యలకు మద్దతు తెలుపుతుండగా, మరికొందరు ప్రతి సంస్థ పరిస్థితులు వేర్వేరుగా ఉంటాయని అభిప్రాయపడుతున్నారు. దీంతో విదేశీ ఉద్యోగాల వాస్తవ పరిస్థితులపై మరోసారి చర్చ ప్రారంభమైంది.
Also read:
