తెలంగాణ ప్రభుత్వం (RationCard) తెల్ల రేషన్ కార్డుదారులకు అత్యాధునిక స్మార్ట్ రేషన్ కార్డులను అందించేందుకు ఏర్పాట్లు వేగవంతం చేసింది. ప్రస్తుతం ఉన్న పాత రేషన్ కార్డుల స్థానంలో డిజిటల్ సదుపాయాలతో కూడిన కొత్త స్మార్ట్ కార్డులను అర్హులైన కుటుంబాలకు పంపిణీ చేయనుంది. కార్డుల ముద్రణ పూర్తవడంతో పాటు జిల్లాల వారీగా పంపిణీకి సంబంధించిన ఏర్పాట్లు కూడా పూర్తి చేసినట్లు అధికార వర్గాలు తెలిపాయి.
ప్రభుత్వ సమాచారం ప్రకారం, ముఖ్యమంత్రి రేవంత్ రెడ్డి చేతుల మీదుగా హైదరాబాద్లో ఈ కార్యక్రమాన్ని ప్రారంభించే అవకాశం ఉంది. అనంతరం రాష్ట్రంలోని అన్ని నియోజకవర్గాల్లో మంత్రులు, ఎమ్మెల్యేలు లబ్ధిదారులకు స్మార్ట్ రేషన్ కార్డులను పంపిణీ చేయనున్నారు. ఆగస్టు తొలి వారంలో లేదా స్వాతంత్య్ర దినోత్సవం సందర్భంగా ఈ కార్యక్రమం ప్రారంభమయ్యే అవకాశం ఉందని తెలుస్తోంది.
కొత్త స్మార్ట్ (RationCard) రేషన్ కార్డులు క్రెడిట్ లేదా డెబిట్ కార్డు తరహాలో రూపొందించబడ్డాయి. వీటిపై ముద్రించిన క్యూఆర్ కోడ్ ద్వారా కార్డు వివరాలను వేగంగా ధృవీకరించవచ్చు. భవిష్యత్తులో ప్రభుత్వ సంక్షేమ పథకాల అమలు మరింత పారదర్శకంగా, సులభంగా నిర్వహించేందుకు ఈ కార్డులు ఉపయోగపడనున్నాయి. రాష్ట్రవ్యాప్తంగా సుమారు 1.05 కోట్ల మంది లబ్ధిదారులకు ఈ కార్డులు అందే అవకాశం ఉంది.
అయితే స్మార్ట్ రేషన్ కార్డు పొందాలంటే ఈ-కేవైసీ పూర్తి చేయడం తప్పనిసరి అని ప్రభుత్వం స్పష్టం చేసింది. ప్రస్తుతం లక్షలాది మంది లబ్ధిదారులు ఇంకా ఈ ప్రక్రియ పూర్తి చేయలేదు. అందుకే జూలై 31లోపు ప్రతి అర్హుడి ఈ-కేవైసీ పూర్తి చేయాలని జిల్లా అధికారులకు ఆదేశాలు జారీ చేశారు.
ఈ లక్ష్యాన్ని సాధించేందుకు ప్రత్యేక బృందాలు గ్రామాలు, పట్టణాల్లో ఇంటింటికీ వెళ్లి బయోమెట్రిక్ నమోదు చేస్తున్నాయి. అలాగే రేషన్ దుకాణాలు, ప్రత్యేక శిబిరాల్లో కూడా ఈ-కేవైసీ సేవలు అందుబాటులో ఉన్నాయి. ప్రస్తుతం ఎక్కడ నివసిస్తున్నారో అక్కడి సమీప రేషన్ దుకాణంలోనే ఈ ప్రక్రియ పూర్తి చేసుకునే అవకాశం కల్పించారు. స్వగ్రామానికి వెళ్లాల్సిన అవసరం లేదని అధికారులు తెలిపారు.
ఈ-కేవైసీ ద్వారా రేషన్ కార్డుల డేటాబేస్ను కూడా ప్రభుత్వం నవీకరించనుంది. మరణించిన వారు లేదా శాశ్వతంగా ఇతర ప్రాంతాలకు వెళ్లిన వారి వివరాలను తొలగించి అర్హుల జాబితాను ఖరారు చేయనుంది. 8 సంవత్సరాలు దాటిన ప్రతి సభ్యుడు బయోమెట్రిక్ ధృవీకరణ పూర్తి చేయాలని, గడువు ముగిసేలోపు నమోదు చేసుకోవాలని అధికారులు సూచిస్తున్నారు.
Also read:
