పేద మరియు మధ్యతరగతి విద్యార్థులు ఉన్నత విద్యను కొనసాగించేందుకు కేంద్ర ప్రభుత్వం అమలు చేస్తున్న (PM Vidyalaxmi) ‘పీఎం విద్యాలక్ష్మి’ పథకం ప్రస్తుతం పెద్ద ఎత్తున చర్చనీయాంశంగా మారింది. నవంబర్ 2024లో ప్రారంభమైన ఈ పథకం ద్వారా అర్హత గల విద్యార్థులు ఎలాంటి పూచీకత్తు లేదా గ్యారెంటీ లేకుండానే విద్యా రుణం పొందే అవకాశం కల్పించబడింది.
ఈ పథకం దేశవ్యాప్తంగా గుర్తింపు పొందిన 860 ఉన్నత విద్యాసంస్థల్లో ప్రవేశం పొందిన విద్యార్థులకు వర్తిస్తుంది. డిగ్రీ మరియు డిప్లొమా కోర్సుల్లో మెరిట్ ఆధారంగా లేదా ప్రవేశ పరీక్షల ద్వారా సీటు పొందిన విద్యార్థులు దరఖాస్తు చేసుకోవచ్చు. మేనేజ్మెంట్ కోటా లేదా ఇతర ప్రత్యేక కోటాల ద్వారా ప్రవేశం పొందినవారు ఈ (PM Vidyalaxmi) పథకానికి అర్హులు కారు.
ప్రభుత్వ లెక్కల ప్రకారం ప్రతి ఏడాది 22 లక్షల మందికిపైగా విద్యార్థులు ఈ పథకం ద్వారా ప్రయోజనం పొందుతున్నారు. వీరిలో సుమారు 7 లక్షల మంది కొత్తగా ఉన్నత విద్యలో చేరే విద్యార్థులే. కోర్సు ఫీజు మరియు ఇతర విద్యా సంబంధిత ఖర్చుల ఆధారంగా రుణ మొత్తం నిర్ణయించబడుతుంది. కేంద్ర ప్రభుత్వం రుణానికి గరిష్ట పరిమితిని నిర్దిష్టంగా నిర్ణయించకపోయినా, అర్హులైన విద్యార్థులు రూ.20 లక్షల వరకు విద్యా రుణం పొందే అవకాశం ఉందని అధికారులు చెబుతున్నారు.
ఈ పథకంలోని ముఖ్యమైన ప్రయోజనం పూచీకత్తు అవసరం లేకపోవడం. రూ.7.5 లక్షల వరకు విద్యా రుణాలకు ప్రభుత్వం బ్యాంకులకు 75 శాతం వరకు హామీ ఇస్తుంది. కుటుంబ వార్షిక ఆదాయం రూ.4.5 లక్షల వరకు ఉన్న విద్యార్థులకు కోర్సు కాలంలో 100 శాతం వడ్డీ రాయితీ లభిస్తుంది. రూ.4.5 లక్షల నుంచి రూ.8 లక్షల మధ్య ఆదాయం ఉన్న కుటుంబాల విద్యార్థులకు రూ.10 లక్షల వరకు రుణాలపై 3 శాతం వడ్డీ సబ్సిడీ అందుతుంది.
షెడ్యూల్డ్ కమర్షియల్ బ్యాంకులు, ప్రాంతీయ గ్రామీణ బ్యాంకులు మరియు సహకార బ్యాంకుల ద్వారా ఈ రుణాలు అందుబాటులో ఉంటాయి. విద్యార్థులు పీఎం విద్యాలక్ష్మి యూనిఫైడ్ పోర్టల్లో ఆధార్, మొబైల్ నంబర్, ఇమెయిల్ వంటి వివరాలతో నమోదు చేసుకుని, కోర్సు మరియు కళాశాల వివరాలు నమోదు చేసి తమకు కావాల్సిన బ్యాంకును ఎంచుకుని ఆన్లైన్లో దరఖాస్తు సమర్పించవచ్చు. దరఖాస్తు స్థితిని కూడా అదే పోర్టల్లో తెలుసుకునే సౌకర్యం కల్పించారు.
Also read:
