(CM Vijay) తమిళనాడు ప్రభుత్వం కీలక నిర్మాణ సామగ్రి ఎగుమతులపై సంచలన నిర్ణయం తీసుకుంది. రాష్ట్రంలో పెరుగుతున్న నిర్మాణ అవసరాలను దృష్టిలో ఉంచుకుని రాళ్లు, ఎమ్-శాండ్, మెటల్ జెల్లీ వంటి నిర్మాణ సామగ్రిని ఇతర రాష్ట్రాలకు మూడు నెలల పాటు తరలించకుండా తాత్కాలిక నిషేధం విధించింది. ఈ నిర్ణయం ముఖ్యంగా ఆంధ్రప్రదేశ్, కర్ణాటక, కేరళ రాష్ట్రాల నిర్మాణ రంగంపై ప్రభావం చూపే అవకాశం ఉందని భావిస్తున్నారు. అయితే పుదుచ్చేరి, కారైకాల్ ప్రాంతాలకు మాత్రం ఈ నిషేధం నుంచి మినహాయింపు కల్పించారు.
తమిళనాడులో వేగంగా జరుగుతున్న పట్టణీకరణ, భారీ మౌలిక వసతుల ప్రాజెక్టులు, గృహ నిర్మాణాల కారణంగా నిర్మాణ సామగ్రికి భారీ డిమాండ్ ఏర్పడింది. రాష్ట్రంలోని క్వారీల నుంచి లభించే రాతి ఉత్పత్తులు స్థానిక అవసరాలకు సరిపోవడం లేదని ప్రభుత్వం వెల్లడించింది. ఇదే సమయంలో పొరుగు రాష్ట్రాలకు పెద్దఎత్తున సరఫరా జరగడం వల్ల స్థానిక మార్కెట్లో కొరత ఏర్పడి ధరలు పెరుగుతున్నాయని అధికారులు పేర్కొన్నారు. ఈ పరిస్థితిని నియంత్రించి రాష్ట్రంలోని అభివృద్ధి పనులు నిరంతరంగా కొనసాగేందుకు ఈ నిర్ణయం తీసుకున్నట్లు ప్రభుత్వం స్పష్టం చేసింది.
నిషేధాన్ని కఠినంగా అమలు చేయాలని సరిహద్దు జిల్లాల కలెక్టర్లు, ఎస్పీలు, మైనింగ్ మరియు రవాణా శాఖ అధికారులకు ప్రత్యేక ఆదేశాలు జారీ అయ్యాయి. అక్రమంగా నిర్మాణ సామగ్రిని రాష్ట్ర సరిహద్దులు దాటించేందుకు ప్రయత్నించే వారిపై తమిళనాడు అక్రమ మైనింగ్, రవాణా నిరోధక చట్టం కింద కఠిన చర్యలు తీసుకుంటామని ప్రభుత్వం హెచ్చరించింది. నిబంధనలు ఉల్లంఘిస్తే వాహనాల స్వాధీనం, భారీ జరిమానాలు విధించనున్నట్లు వెల్లడించింది.
ఈ నిర్ణయంతో (CM Vijay) కేరళ ప్రభుత్వం ఆందోళన వ్యక్తం చేసింది. ముఖ్యంగా కన్యాకుమారి, తిరునెల్వేలి, తెంకాసి జిల్లాల నుంచి కేరళకు చేరే రాతి సామగ్రి నిలిచిపోవడం వల్ల జాతీయ రహదారి పనులు, విజింజం పోర్టు అభివృద్ధి, వల్లార్పాడమ్ ప్రాజెక్టు విస్తరణ వంటి కీలక పనులు ప్రభావితమయ్యే అవకాశం ఉందని కేరళ ముఖ్యమంత్రి పేర్కొన్నారు. జాతీయ ప్రాధాన్య ప్రాజెక్టులను దృష్టిలో ఉంచుకుని తమ రాష్ట్రానికి సరఫరా అయ్యే నిర్మాణ సామగ్రికి ప్రత్యేక మినహాయింపు ఇవ్వాలని తమిళనాడు ముఖ్యమంత్రికి లేఖ రాసినట్లు సమాచారం. ఈ నిర్ణయంపై పొరుగు రాష్ట్రాలు ఎలా స్పందిస్తాయన్నది ఇప్పుడు ఆసక్తికరంగా మారింది.
Also read:
