(TamilNadu) తమిళనాడులోని సేలం జిల్లాలో ఆశ్చర్యానికి గురిచేసే మోసం వెలుగులోకి వచ్చింది. రూ.15 వేల నగదు ఇస్తామని నమ్మబలికి మహిళలతో గుండు గీయించిన ఘటన స్థానికంగా సంచలనం సృష్టించింది. ఈ సంఘటన ప్రముఖ తెలుగు చిత్రం విక్రమార్కుడులో కనిపించిన మోసపూరిత సన్నివేశాన్ని గుర్తు చేస్తోందని పలువురు వ్యాఖ్యానిస్తున్నారు. అయితే ఇది సినిమా కాదు, నిజ జీవితంలో జరిగిన మోసం కావడం మరింత ఆందోళన కలిగిస్తోంది.
సేలం జిల్లా పుదుకొత్తంబాడి గ్రామానికి చెందిన పళనియమ్మాళ్కు ఓ అజ్ఞాత వ్యక్తి ఫోన్ చేసి తాను ప్రభుత్వ ఉన్నతాధికారినని పరిచయం చేసుకున్నాడు. కరోనా తరహాలో కొత్త వైరస్ మహిళల్లో వ్యాపిస్తోందని, విదేశాల్లో ఆ వ్యాధి నుంచి బయటపడేందుకు మహిళలు గుండు గీయించుకున్నారని చెప్పి నమ్మించాడు. అదే విధానాన్ని ఇప్పుడు (TamilNadu) తమిళనాడు ప్రభుత్వం అమలు చేస్తోందని, గుండు చేయించుకున్న మహిళలకు రూ.15 వేల ప్రోత్సాహక నగదు అందిస్తారని వివరించాడు.
అంతేకాకుండా విద్యార్థినులకు రూ.45 వేల ఆర్థిక సహాయం, ఉచిత ల్యాప్టాప్, పురుషులకు రూ.6 వేల ప్రోత్సాహకం కూడా ఇస్తారని చెప్పి మరింత నమ్మకం కలిగించాడు. మొదటి విడతలో కేవలం 18 మందికే అవకాశం ఉందని, పళనియమ్మాళ్ పేరు జాబితాలో ఉందని చెప్పడంతో ఆమె పూర్తిగా విశ్వసించింది. ఈ విషయాన్ని గ్రామంలోని ఇతర మహిళలకు తెలియజేయడంతో ముగ్గురు మహిళలు క్షురకుడిని పిలిపించి గుండు గీయించుకున్నారు.
తర్వాత డబ్బు కోసం ఫోన్ చేయగా ఆ వ్యక్తి మొబైల్ స్విచ్ఆఫ్లో ఉండటంతో అనుమానం వచ్చింది. అధికారులను సంప్రదించి విచారించగా ప్రభుత్వం నుంచి అలాంటి పథకం ఏదీ లేదని తెలిసింది. దీంతో తాము మోసపోయామని మహిళలు గుర్తించి పోలీసులకు ఫిర్యాదు చేశారు. ఈ ఘటనపై కేసు నమోదు చేసిన పోలీసులు నిందితుడి కోసం దర్యాప్తు చేపట్టారు.
ఈ సంఘటన ప్రజల్లో అవగాహన ఎంత ముఖ్యమో మరోసారి గుర్తు చేసింది. ప్రభుత్వ పేరుతో ఫోన్ కాల్స్, సందేశాలు వచ్చినప్పుడు అధికారికంగా ధృవీకరించకుండా నమ్మరాదని పోలీసులు సూచిస్తున్నారు. సామాజిక మాధ్యమాలు, ఫోన్ కాల్స్ ద్వారా వస్తున్న తప్పుడు ప్రచారాల పట్ల అప్రమత్తంగా ఉండాలని, అనుమానం ఉంటే వెంటనే సంబంధిత అధికారులను సంప్రదించాలని హెచ్చరిస్తున్నారు.
Also read:
